2 கைப்பிடி சின்ன வெங்காயமும், 2 கைப்பிடி கறிவேப்பிலையும் இருந்தா.. சாதத்துக்கு இப்படி செஞ்சு சாப்பிட்டு பாருங்

Chinna Vengaya Kariveppilai Thogayal Recipe In Tamil: உங்களுக்கு மதிய வேளையில் சமைக்க பிடிக்கவில்லையா? சிம்பிளாக சமையலை முடிக்க நினைக்கிறீர்களா? அதுவும் சாம்பார், புளிக்குழம்பு சாப்பிட்டு போரடித்துவிட்டதா? அப்படியானால் துவையலை செய்யுங்கள். அதுவும் 2 கைப்பிடி சின்ன வெங்காயமும், 2 கைப்பிடி கறிவேப்பிலையும் இருந்தால், அதைக் கொண்டு அட்டகாசமான சுவையில் துவையலை செய்யுங்கள்.

இந்த துவையலை சூடான சாதத்துடன் சேர்த்து பிசைந்து சாப்பிடும் போது, சுவை பிரமாதமாக இருக்கும். முக்கியமாக இந்த துவையல் ருசியானது மட்டுமின்றி, சத்தானதும் கூட. இந்த துவையலில் சேர்க்கப்படும் கறிவேப்பிலை செரிமானத்திற்கும், இதயத்திற்கும், தலைமுடியின் ஆரோக்கியத்திற்கும், எடை இழப்புக்கும் உதவுகிறது. எனவே அடிக்கடி துவையலை செய்து சாப்பிடுங்கள்.

உங்களுக்கு சின்ன வெங்காய கறிவேப்பிலை துவையலை எப்படி செய்வதென்று தெரிந்து கொள்ள வேண்டுமா? கீழே சின்ன வெங்காய கறிவேப்பிலை துவையல் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* நல்லெண்ணெய் - 2 டீஸ்பூன்
* பூண்டு - 6-8
* சீரகம் - 1 டீஸ்பூன்
* புளி - நெல்லிக்காய் அளவு
* சின்ன வெங்காயம் - 2 கைப்பிடி
* மஞ்சள் தூள் - 1/2 டீஸ்பூன்
* மிளகாய் தூள் - 1 டீஸ்பூன்
* கறிவேப்பிலை - 2 கைப்பிடி
* உப்பு - சுவைக்கேற்ப

செய்முறை:

* முதலில் ஒரு வாணலியை அடுப்பில் வைத்து, அதில் நல்லெண்ணெய் ஊற்றி சூடேற்ற வேண்டும்.
* எண்ணெய் சூடானதும், அதில் சீரகத்தை சேர்த்து தாளித்து, பின் பூண்டு பற்களை சேர்த்து வதக்க வேண்டும்.
* அடுத்து அதில் நெல்லிக்காய் அளவு புளி மற்றும் 2 கைப்பிடி சின்ன வெங்காயத்தை சேர்த்து, பொன்னிறமாகும் வரை வதக்க வேண்டும்.
* பின்பு அதில் மஞ்சள் தூள் மிளகாய் தூள் சேர்த்து நன்கு கிளறி விட வேண்டும்.
* பிறகு அதில் 2 கைப்பிடி கறிவேப்பிலையை சேர்த்து, சுவைக்கேற்ப உப்பு தூவி, கறிவேப்பிலை சுருங்க வதக்கி இறக்கி குளிர வைக்க வேண்டும்.
* இறுதியாக வதக்கிய பொருட்களை மிக்சர் ஜாரில் போட்டு, நீரை ஊற்றாமல் நன்கு அரைத்து எடுத்தால், சுவையான சின்ன வெங்காய கறிவேப்பிலை துவையல் தயார்.