ருசியான மற்றும் காரசாரமான... சில்லி ராஜ்மா

தினமும் என்ன சமைப்பது என்று தெரியாமல் புலம்புகிறீர்களா? உங்கள் வீட்டில் ராஜ்மா உள்ளதா? அப்படியானால் அந்த ராஜ்மாவைக் கொண்டு ஒரு சுவையான சைடு டிஷ் செய்யுங்கள். அதுவும் தற்போது குளிர்காலம் என்பதால் பலரும் சற்று காரசாரமாக சாப்பிட விரும்புவதுண்டு. அத்தகையவர்கள் சில்லி ராஜ்மா செய்து சாப்பிடலாம். இந்த சில்லி ராஜ்மா சாதம், சப்பாத்தி, பூரி போன்றவற்றுடன் சேர்த்து சாப்பிட அற்புதமாக இருக்கும். மேலும் இந்த சில்லி ராஜ்மா செய்வது மிகவும் சுலபம். ஆனால் ராஜ்மாவை சமைக்க வேண்டுமானால், அதை குறைந்தது 7-8 மணிநேரம் ஊற வைக்க வேண்டும்.

உங்களுக்கு சில்லி ராஜ்மா எப்படி செய்வதென்று தெரிந்து கொள்ள வேண்டுமா? கீழே சில்லி ராஜ்மாவின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* ராஜ்மா - 1 கப்

* எண்ணெய் - 4 டேபிள் ஸ்பூன்

* சீரகம் - 1 டீஸ்பூன்

* மிளகாய் தூள் - 2 டீஸ்பூன்

* மல்லித் தூள் - 1 டேபிள் ஸ்பூன்

* கரம் மசாலா - 2 டீஸ்பூன்

* மஞ்சள் தூள் - 1/2 டீஸ்பூன்

* உப்பு - சுவைக்கேற்ப

* பச்சை மிளகாய் - 3 (பொடியாக நறுக்கியது)

* இஞ்சி - 1 டேபிள் ஸ்பூன் (துருவியது)

* பூண்டு - 1 டேபிள் ஸ்பூன் (துருவியது)

* கொத்தமல்லி - ஒரு கையளவு (நறுக்கியது)

செய்முறை:

* முதலில் ராஜ்மாவை நீரில் 8 மணிநேரம் ஊற வைக்க வேண்டும்.

* பின் குக்கரில் ஊற வைத்த ராஜ்மாவை போட்டு, நீரை ஊற்றி அடுப்பில் வைத்து, குக்கரை மூடி 7-8 விசில் விட்டு இறக்கிக் கொள்ள வேண்டும். விசில் போனதும் குக்கரைத் திறந்து ராஜ்மாவை தனியாக வைத்துக் கொள்ள வேண்டும்.

* பின்னர் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், சீரகத்தைப் போட்டு தாளிக்க வேண்டும்.

* பின்பு அதில் பச்சை மிளகாய், இஞ்சி, பூண்டு சேர்த்து ஒரு நிமிடம் வதக்க வேண்டும்.

* பிறகு அதில் மஞ்சள் தூள், மிளகாய் தூள், மல்லித் தூள், கரம் மசாலா, சீரகத் தூள் சேர்த்து கிளறி, சிறிது நீரை ஊற்றி 1 நிமிடம் வேக வைக்க வேண்டும்.

* அடுத்து அதில் வேக வைத்த ராஜ்மாவை சேர்த்து கிளறி, சுவைக்கேற்ப உப்பு சேர்த்து, கொத்தமல்லியைத் தூவி கிளறி 5 நிமிடம் குறைவான தீயில் வைத்து கொதிக்க வைத்து இறக்கினால், சுவையான சில்லி ராஜ்மா தயார்.

Image Courtesy: yummytummyaarthi