சில்லி மீல் மேக்கர்

குளிர்காலத்தில் நன்கு வாய் ருசியாக சாப்பிட வேண்டுமென்று தோன்றும். அதுவும் மாலை வேளையில் பலக்கும் சூடாக எதையாவது சாப்பிட ஆசை எழும். உங்கள் வீட்டில் மீல் மேக்கர் உள்ளதா? நீங்களும் உங்கள் வீட்டில் உள்ளோரும் மீல் மேக்கரை விரும்பி சாப்பிடுவீர்களா? அப்படியானால் அந்த மீல் மேக்கரைக் கொண்டு ஒரு சுவையான ஸ்நாக்ஸ் செய்யுங்கள். அது தான் சில்லி மீல் மேக்கர். இது ருசியாக இருப்பதோடு, பசியையும் தணிக்கும். மேலும் இதை வீட்டிற்கு விருந்தினர்கள் வந்திருக்கும் போது செய்து கொடுத்தால், அவர்களின் பாராட்டைப் பெறலாம்.

உங்களுக்கு சில்லி மீல் மேக்கர் எப்படி எளிய முறையில் செய்வதென்று தெரிந்து கொள்ள வேண்டுமா? கீழே சில்லி மீல் மேக்கர் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பெரிய வெங்காயம் - 1 (நறுக்கியது)

* இஞ்சி பூண்டு பேஸ்ட் - 1 டேபிள் ஸ்பூன்

* பச்சை குடைமிளகாய் - 1 (நறுக்கியது)

* பச்சை மிளகாய் - 2 (கீறியது)

* வினிகர் - 2 டீஸ்பூன்

* க்ரீன் சில்லி சாஸ் - 1 டேபிள் ஸ்பூன்

* தக்காளி கெட்சப் - 2 டேபிள் ஸ்பூன்

* ரெட் சில்லி சாஸ் - 1 டேபிள் ஸ்பூன்

* சோயா சாஸ் - 1 டீஸ்பூன்

* உப்பு - சுவைக்கேற்ப

* சர்க்கரை - 1 டீஸ்பூன்

ஊற வைப்பதற்கு...

* மீல் மேக்கர் - 3 கப் (வேக வைத்தது)

* இஞ்சி பூண்டு பேஸ்ட் - 1 டேபிள் ஸ்பூன்

* மிளகாய் தூள் - 1 டேபிள் ஸ்பூன்

* சோள மாவு - 3 டேபிள் ஸ்பூன்

* எண்ணெய் - 3 டேபிள் ஸ்பூன்

செய்முறை:

* முதலில் மீல் மேக்கரை கொதிக்கும் நீரில் போட்டு, 10 நிமிடம் ஊற வைத்து, பின் அதை குளிர்ந்த நீரில் ஒருமுறை அலசி, அதிகப்படியான நீரைப் பிழிந்துவிட்டு தனியாக வைத்துக் கொள்ள வேண்டும்.

* பின்னர் ஒரு பாத்திரத்தில் மீல் மேக்கரைப் போட்டு, அத்துடன் ஊற வைப்பதற்கு கொடுத்துள்ள இஞ்சி பூண்டு பேஸ்ட், மிளகாய் தூள், சோள மாவு சேர்த்து நன்கு பிரட்டிக் கொள்ள வேண்டும்.

* பின்பு ஒரு வாணலியை அடுப்பில் வைத்து, அதில் 3 டேபிள் ஸ்பூன் எண்ணெய் ஊற்றி சூடானதும், மீல் மேக்கரைப் போட்டு பொன்னிறமாக பொரித்து தனியாக ஒரு தட்டில் எடுத்து வைத்துக் கொள்ள வேண்டும்.

* பின் வாணலியில் உள்ள மீதமுள்ள எண்ணெயில் வெங்காயம், இஞ்சி பூண்டு பேஸ்ட் சேர்த்து 2 நிமிடம் வதக்க வேண்டும்.

* அடுத்து அதில் குடைமிளகாய், பச்சை மிளகாய் சேர்த்து மீண்டும் 2 நிமிடம் வதக்க வேண்டும்.

* பின் அதில் சர்க்கரை, உப்பு மற்றும் அனைத்து வகையான சாஸ்களையும் சேர்த்து நன்கு கிளறி, 5 நிமிடம் வேக வைக்க வேண்டும்.

* பின்பு அதில் பொரித்த மீல் மேக்கரை சேர்த்து, சாஸ் உடன் நன்கு கிளறி விட்டு, 2 நிமிடம் வேக வைத்து இறக்கினால், சுவையான சில்லி மீல் மேக்கர் தயார்.

Image Courtesy: yummytummyaarthi