சிக்கன் கொத்துக்கறியை வெச்சு இந்த மாதிரி ஒரு மசாலா செய்யுங்க.. பூரி, சப்பாத்திக்கு அட்டகாசமா இருக்கும்...

Chicken Keema Masala Recipe In Tamil: இன்று விடுமுறை என்பதால் பலரது வீடுகளில் காலையில் இட்லி, பூரி என்று செய்து, அதற்கு சைடு டிஷ்ஷாக மட்டன், சிக்கனை வாங்கி சமைப்பார்கள். இன்று உங்கள் வீட்டில் பூரி செய்ய போகிறீர்கள் என்றால், அதற்கு சிக்கன் சைடு டிஷ் செய்ய திட்டமிட்டிருந்தால், வழக்கமாக செய்யும் சிக்கன் கிரேவி அல்லது மசாலாவை செய்வதற்கு பதிலாக, சிக்கன் கொத்துக்கறியை வாங்கி மசாலா செய்யுங்கள்.

இந்த சிக்கன் கீமா மசாலா பூரி மற்றும் சப்பாத்தியுடன் சாப்பிட அட்டகாசமாக இருக்கும். இதுவரை நீங்கள் சிக்கன் கீமாவை செய்ததில்லை என்றால், இன்று கட்டாயம் ட்ரை செய்யுங்கள். இந்த கீமா மசாலா குழந்தைகள் முதல் பெரியவர்கள் வரை அனைவரும் விரும்பி சாப்பிடக்கூடியவாறு இருக்கும்.

உங்களுக்கு சிக்கன் கீமா மசாலாவை எப்படி செய்வதென்று தெரிந்து கொள்ள வேண்டுமா? கீழே சிக்கன் கீமா மசாலா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 3 டேபிள் ஸ்பூன்
* பட்டை - 1 துண்டு
* சோம்பு - 1/4 டீஸ்பூன்
* வெங்காயம் - 2 (பொடியாக நறுக்கியது)
* கறிவேப்பிலை - சிறிது
* பச்சை மிளகாய் - 2
* உப்பு - சுவைக்கேற்ப
* இஞ்சி பூண்டு பேஸ்ட் - 1 டீஸ்பூன்
* தக்காளி - 2 (அரைத்தது)
* மஞ்சள் தூள் - 1/4 டீஸ்பூன்
* மல்லித் தூள் - 2 டீஸ்பூன்
* சிக்கன் மசாலா - 3/4 டீஸ்பூன்
* மிளகாய் தூள் - 1/2 டீஸ்பூன்
* சீரகத் தூள் - 1/4 டீஸ்பூன்
* கரம் மசாலா - 1/2 டீஸ்பூன்
* மிளகுத் தூள் - 1/4 டீஸ்பூன்
* சிக்கன் கீமா/கொத்துக்கறி - 1/4 கிலோ
* ஏலக்காய் தூள் - 1 சிட்டிகை
* தண்ணீர் - தேவையான அளவு
* வெண்ணெய் - 1/2 டீஸ்பூன்
* கொத்தமல்லி - சிறிது

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், பட்டை, சோம்பு சேர்த்து தாளிக்க வேண்டும்.
* பின் அதில் வெங்காயத்தை சேர்த்து நிறம் மாறும் வரை வதக்க வேண்டும்.
* பின்பு கறிவேப்பிலை, பச்சை மிளகாய் மற்றும் சிறிது உப்பு தூவி நன்கு வதக்க வேண்டும்.
* பின் இஞ்சி பூண்டு பேஸ்ட் சேர்த்து பச்சை வாசனை போக வதக்க வேண்டும்.
* அடுத்து அரைத்து வைத்துள்ள தக்காளியை சேர்த்து 5 நிமிடம் நன்கு மென்மையாகும் வரை வதக்க வேண்டும்.
* பிறகு அதில் மஞ்சள் தூள், மல்லித் தூள், சிக்கன் மசாலா, மிளகாய் தூள், சீரகத் தூள், கரம் மசாலா, மிளகுத் தூள் சேர்த்து நன்கு 3 நிமிடம் கிளறி விட வேண்டும்.
* பின் சிக்கன் கொத்துக்கறியை கழுவி மசாலாவுடன் சேர்த்து, அத்துடன் ஏலக்காய் தூள் சேர்த்து நன்கு கிளறி விட்டு, மூடி வைத்து 5 நிமிடம் சிக்கனை வேக வைக்க வேண்டும்.
* பின்னர் மசாலாவிற்கு தேவையான அளவு நீரை ஊற்றி, உப்பு சுவை பார்த்து வேண்டுமானால் உப்பையும் சேர்த்து நன்கு கிளறி, குறைவான தீயில் வைத்து 10 நிமிடம் சிக்கனை வேக வைக்க வேண்டும்.
* 10 நிமிடம் கழித்து, மூடியைத் திறந்து, வெண்ணெய் மற்றும் கொத்தமல்லித் தூவி கிளறி இறக்கினால், சுவையான சிக்கன் கீமா மசாலா தயார்.

Image Courtesy: Sashi Recipes