சப்பாத்திக்கு முட்டை கிரேவியை ஒருமுறை இப்படி செய்யுங்க.. டேஸ்ட் இன்னும் அருமையா இருக்கும்...

Chapati Egg Gravy Recipe In Tamil: உங்கள் வீட்டில் அடிக்கடி சப்பாத்தி செய்வீர்களா? அந்த சப்பாத்திக்கு அடிக்கடி முட்டை கிரேவி செய்வீர்களா? எப்போதும் ஒரே மாதிரி முட்டை கிரேவியை செய்வீர்களா? அப்படியானால் அடுத்தமுறை முட்டை கிரேவியை செய்வதாக இருந்தால், முட்டையை வேக வைத்து வெட்டியோ அல்லது உடைத்து ஊற்றியோ செய்யாமல், துருவிப் போட்டு செய்யுங்கள். இதனால் ருசி இன்னும் அற்புதமாக இருக்கும். முக்கியமாக இப்படி முட்டை கிரேவியை செய்யும் போது குழந்தைகள் ஒரு சப்பாத்தியை எக்ஸ்ட்ரா சாப்பிடுவார்கள்.

உங்களுக்கு முட்டை கிரேவியை எப்படி செய்வதென்று தெரிந்து கொள்ள வேண்டுமா? கீழே முட்டை கிரேவி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 2 டேபிள் ஸ்பூன்
* வெங்காயம் - 3 (பொடியாக நறுக்கியது)
* கறிவேப்பிலை - 1 கொத்து
* தக்காளி - 2 (அரைத்தது)
* இஞ்சி பூண்டு பேஸ்ட் - 1 டீஸ்பூன்
* மிளகாய் தூள் - 1 டீஸ்பூன்
* மல்லித் தூள் - 1 1/2 டீஸ்பூன்
* சோம்புத் தூள் - 1/2 டீஸ்பூன்
* சீரகத் தூள் - 1/2 டீஸ்பூன்
* மிளகுத் தூள் - 1/2 டீஸ்பூன்
* மஞ்சள் தூள் - 1/4 டீஸ்பூன்
* உப்பு - சுவைக்கேற்ப
* தண்ணீர் - தேவையான அளவு
* வேக வைத்த முட்டை - 4 (துருவிக் கொள்ளவும்)
* கொத்தமல்லி - சிறிது (பொடியாக நறுக்கியது)

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், பொடியாக நறுக்கிய வெங்காயம் மற்றும் கறிவேப்பிலை சேர்த்து நன்கு பொன்னிறமாக வதக்க வேண்டும்.
* பின்னர் அதில் அரைத்த தக்காளி மற்றும் இஞ்சி பூண்டு பேஸ்ட் சேர்த்து பச்சை வாசனை போக வதக்க வேண்டும்.
* பின் அதில் மிளகாய் தூள், மல்லித் தூள், சோம்புத் தூள், சீரகத் தூள், மிளகுத் தூள், மஞ்சள் தூள் மற்றும் சுவைக்கேற்ப உப்பு சேர்த்து நன்கு 3-4 நிமிடம் வதக்க வேண்டும்.
* பின்பு அதில் கிரேவிக்கு தேவையான அளவு தண்ணீர் ஊற்றி, மிதமான தீயில் வைத்து 5 நிமிடம் நன்கு கொதிக்க வைக்க வேண்டும்.
* கிரேவி கொதிப்பதற்குள், வேக வைத்த முட்டைகளை துருவிக் கொள்ள வேண்டும்.
* கிரேவி நன்கு கொதித்த பின், துருவி வைத்துள்ள முட்டையை சேர்த்து நன்கு கிளறி, 5 நிமிடம் மிதமான தீயில் கொதிக்க வைத்து, கொத்தமல்லியைத் தூவி இறக்கினால், சுவையான முட்டை கிரேவி தயார்.

Image Courtesy: Apoorvaa's Nalabagam