சப்பாத்திக்கு சூப்பராக இருக்கும்... காலிஃப்ளவர் பச்சை பட்டாணி சப்ஜி

இன்று இரவு உங்கள் வீட்டில் என்ன செய்வது என்று யோசித்துக் கொண்டிருக்கிறீர்களா? நீங்கள் சப்பாத்தி செய்ய நினைத்தால், அதற்கு அட்டகாசமான சுவையைக் கொண்ட காலிஃப்ளவர் பச்சை பட்டாணி சப்ஜி செய்யுங்கள். இந்த சப்ஜி செய்வது மிகவும் சுலபம். முக்கியமாக இது வேலை முடிந்து மாலையில் வீட்டிற்கு வந்ததும் சீக்கிரம் செய்யும் வகையில் ஈஸியான செய்முறையைக் கொண்டது. மேலும் பேச்சுலர்கள் கூட இந்த சப்ஜியை முயற்சிக்கலாம். இந்த சப்ஜி சப்பாத்திக்கு மட்டுமின்றி, பூரி, சாதம் போன்றவற்றுடன் சேர்த்து சாப்பிட அற்புதமாக இருக்கும்.

உங்களுக்கு காலிஃப்ளவர் பச்சை பட்டாணி சப்ஜி எப்படி செய்வதென்று தெரிந்து கொள்ள வேண்டுமா? கீழே காலிஃப்ளவர் பச்சை பட்டாணி சப்ஜி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* காலிஃப்ளவர் - 1 கப்

* பச்சை பட்டாணி - 1 கப்

* பெரிய வெங்காயம் - 1 (பொடியாக நறுக்கியது)

* பெரிய தக்காளி - 1 (பொடியாக நறுக்கியது)

* இஞ்சி பூண்டு பேஸ்ட் - 1/2 டீஸ்பூன்

* மஞ்சள் தூள் - 1/4 டீஸ்பூன்

* காஷ்மீரி மிளகாய் தூள் - 1 1/2 டீஸ்பூன்

* மல்லித் தூள் - 1 1/2 டீஸ்பூன்

* கரம் மசாலா - 1/2 டீஸ்பூன்

* உப்பு - சுவைக்கேற்ப

தாளிப்பதற்கு...

* பட்டை - 1 துண்டு

* ஏலக்காய் - 2

* எண்ணெய் - 1 டேபிள் ஸ்பூன்

செய்முறை:

* முதலில் ஒரு பாத்திரத்தில் நீரை நிரப்பி, அதில் மஞ்சள் தூள் மற்றும் உப்பு சேர்த்து, பின் காலிஃப்ளவரை சேர்த்து 5 நிமிடம் கொதிக்க வைத்து இறக்கி, நீரை வடிகட்டிவிட்டு தனியாக வைத்துக் கொள்ள வேண்டும்.

* பின்பு ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், பட்டை, ஏலக்காய் சேர்த்து தாளிக்க வேண்டும்.

* பின் அதில் வெங்காயத்தைப் போட்டு, சிறிது உப்பு தூவி நன்கு வதக்க வேண்டும்.

* பிறகு அதில் இஞ்சி பூண்டு பேஸ்ட் சேர்த்து பச்சை வாசனை போக வதக்க வேண்டும்.

* பின்னர் அதில் தக்காளியை சேர்த்து, மஞ்சள் தூள் தூவி, நன்கு மென்மையாகும் வரை வதக்க வேண்டும்.

* பின் அதில் மிளகாய் தூள், மல்லித் தூள், கரம் மசாலா சேர்த்து நன்கு கிளறி விட வேண்டும்.

* பின் அதில் வேக வைத்துள்ள காலிஃப்ளவர் மற்றும் பச்சை பட்டாணி சேர்த்து நன்கு கிளறி, சுவைக்கேற்ப உப்பு சேர்த்து, மூடி வைத்து 10 நிமிடம் வேக வைத்து இறக்கினால், சுவையான காலிஃப்ளவர் பச்சை பட்டாணி சப்ஜி தயார்.