குடைமிளகாயை இந்த பக்குவத்துல பொரியல் செய்யுங்க.. ருசியும் அள்ளும்.. சத்தானதும் கூட..

Capsicum Poriyal Recipe In Tamil: தற்போது மழை பெய்வதால் உடலின் நோயெதிர்ப்பு சக்தியை வலிமையாக வைத்துக் கொள்ள முயற்சிக்க வேண்டும். அதற்கு நோயெதிர்ப்பு சக்தியை அதிகரிக்கும்படியான உணவுகளை தேர்ந்தெடுத்து உட்கொள்ள வேண்டும். நோயெதிர்ப்பு சக்தியை அதிகரிக்க வேண்டுமானால் வைட்டமின் சி நிறைந்த உணவுகளை அதிகம் உட்கொள்ள வேண்டும். இந்த வைட்டமின் சி குடைமிளகாயில் அதிகம் உள்ளது.

ஆனால் குடைமிளகாயை உங்கள் வீட்டில் உள்ளோர் விரும்பி சாப்பிடமாட்டார்களா? அப்படியானால் அவர்களுக்கு குடைமிளகாயை இந்த பக்குவத்தில் பொரியல் செய்யுங்கள். அதுவும் இந்த பொரியலில் சேர்க்கும் வேர்க்கடலை தான் இந்த பொரியலின் சுவையையே அதிகரிக்கிறது. இப்படி செய்யும் போது குடைமிளகாய் பிடிக்காதவர்களும் விரும்பி சாப்பிடுவார்கள்.

உங்களுக்கு குடைமிளகாயை பொரியலை எப்படி செய்வதென்று தெரிந்து கொள்ள வேண்டுமா? கீழே குடைமிளகாய் பொரியல் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* குடைமிளகாய் - 2
* எண்ணெய் - 2 ஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1/2 டீஸ்பூன்
* கடலைப் பருப்பு - 1 டீஸ்பூன்
* வரமிளகாய் - 2
* பூண்டு - 5 பல் (பொடியாக நறுக்கியது)
* வெங்காயம் - 1 (பொடியாக நறுக்கியது)
* கறிவேப்பிலை - 1 கொத்து
* உப்பு - சுவைக்கேற்ப
* மஞ்சள் தூள் - 1/2 டீஸ்பூன்
* வேர்க்கடலை - 2 ஸ்பூன்
* துருவிய தேங்காய் - 1 கைப்பிடி

செய்முறை:

* முதலில் குடைமிளகாயை பொடியாக நறுக்கிக் கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகு, உளுத்தம் பருப்பு, கடலைப் பருப்பு சேர்த்து தாளிக்க வேண்டும்.
* பின்பு அதில் வரமிளகாய், பூண்டு சேர்த்து நன்கு வதக்க வேண்டும்.
* அடுத்து அதில் பொடியாக நறுக்கிய வெங்காயத்தை சேர்த்து, அத்துடன் கறிவேப்பிலையையும் சேர்த்து, வெங்காயம் கண்ணாடி பதத்திற்கு வரும் வரை வதக்க வேண்டும்.
* பிறகு அதில் நறுக்கி வைத்துள்ள குடைமிளகாயை சேர்த்து 2 நிமிடம் நன்கு வதக்க வேண்டும்.
* அதன் பின் அதில் சுவைக்கேற்ப உப்பு தூவி, மஞ்சள் தூள் சேர்த்து கிளறி, மூடி வைத்து மிதமான தீயில் வைத்து 3-4 நிமிடம் குடைமிளகாயை வேக வைக்க வேண்டும்.
* அதற்குள் மிக்சர் ஜாரில் வறுத்த வேர்க்கடலையை சேர்த்து பொடித்துக் கொள்ள வேண்டும்.
* குடைமிளகாய் நன்கு வெந்ததும், அதில் பொடித்து வைத்துள்ள வேர்க்கடலை பொடி மற்றும் துருவிய தேங்காயை சேர்த்து நன்கு 1 நிமிடம் கிளறி இறக்கினால், சுவையான குடைமிளகாய் பொரியல் தயார்.