முட்டைக்கோஸ் வெச்சு ஈவ்னிங் இப்படி மொமோஸ் செஞ்சு சாப்பிடுங்க.. பசியும் அடங்கும்.. எடையும் குறையும்..

Cabbage Momos Recipe In Tamil: டயட்டில் இருப்பவர்களால் கண்டதை சாப்பிட முடியாது. இத்தகையவர்கள் ஸ்நாக்ஸ் சாப்பிட நினைத்தால், சூப், சாலட் என்று தான் சாப்பிட முடியும். ஆனால் டயட்டில் இருப்போருக்கு ஒரு அருமையான ஸ்நாக்ஸ் உள்ளது. அதுதான் முட்டைக்கோஸ் மொமோஸ். பொதுவாக மொமோஸ் மைதா கொண்டு செய்யப்படும்.

ஆனால் இந்த மொமோஸ் முட்டைக்கோஸ் கொண்டு செய்யப்படுவதால், இது எடையைக் குறைக்க நினைப்போருக்கு ஏற்ற ஸ்நாக்ஸாகும். இந்த மொமோஸில் கார்போஹைட்ரேட் குறைவு. மேலும் இது காய்கறிகளைக் கொண்டு செய்யப்படுவதால் சத்தானதும் கூட.

உங்களுக்கு முட்டைக்கோஸ் மொமோஸை எப்படி செய்வதென்று தெரிந்து கொள்ள வேண்டுமா? கீழே முட்டைக்கோஸ் மொமோஸ் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* முட்டைக்கோஸ் - 1
* வெண்ணெய் - 1 டீஸ்பூன்
* பூண்டு - 2 பல் (பொடியாக நறுக்கியது)
* இஞ்சி - சிறிய துண்டு (பொடியாக நறுக்கியது)
* வெங்காயம் - 1 (பொடியாக நறுக்கியது)
* கேரட் - 1 (பொடியாக நறுக்கியது)
* குடைமிளகாய் - 1/2 (பொடியாக நறுக்கியது)
* உப்பு - சிறிது
* சோயா சாஸ் - 1 டீஸ்பூன்
* சீஸ் - சிறிது

செய்முறை:

* முதலில் முட்டைக்கோஸின் இலைகளை தனித்தனியாக பிரித்து எடுத்துக் கொள்ள வேண்டும்.
* பின் ஒரு அகலமான பாத்திரத்தில் நீரை ஊற்றி அடுப்பில் வைத்து, நீர் நன்கு கொதிக்க ஆரம்பித்ததும், அதில் சிறிது உப்பு சேர்த்து கலந்து, முட்டைக்கோஸ் இலைகளை சேர்த்து மூடி வைத்து, வேக வைத்து எடுத்துக் கொள்ள வேண்டும்.
* பின்பு ஒரு வாணலியை அடுப்பில் வைத்து, அதில் வெண்ணெய் சேர்த்து உருகியதும், பொடியாக நறுக்கிய பூண்டு, இஞ்சி, வெங்காயம் சேர்த்து வதக்க வேண்டும்.
* பின் அதில் பொடியாக நறுக்கிய கேரட், குடைமிளகாய், சிறிது நறுக்கிய முட்டைக்கோஸ் சேர்த்து, சிறிது உப்பு தூவி வதக்க வேண்டும்.
* பிறகு அதில் சோயா சாஸை சேர்த்து கிளறி, 1 நிமிடம் வதக்கி, பின் துருவிய சீஸை சிறிது சேர்த்து வதக்கி இறக்கிக் கொள்ள வேண்டும்.
* பின் வேக வைத்த முட்டைக்கோஸ் இலையை எடுத்து, அதன் நடுவே சிறிது வதக்கிய காய்கறிகளை வைத்து, பீடா மடிப்பது போன்று மடித்துக் கொள்ள வேண்டும். இதேப் போல் அனைத்து முட்டைக்கோஸ் இலைகளையும் செய்து கொள்ள வேண்டும்.
* இறுதியாக ஒரு பேனை அடுப்பில் வைத்து, அதில் வெண்ணெய் சிறிது வைத்து உருகியதும், மடித்து வைத்துள்ள முட்டைக்கோஸை வைத்து, முன்னும், பின்னும் ப்ரை செய்து எடுத்தால், சுவையான முட்டைக்கோஸ் மொமோஸ் தயார்.