முட்டைக்கோஸ் இருந்தா.. இந்த மாதிரி கூட்டு செய்யுங்க.. சப்பாத்திக்கு அட்டகாசமா இருக்கும்...

Cabbage Kootu Recipe In Tamil: இன்று இரவு உங்கள் வீட்டில் சப்பாத்தி செய்யப் போகிறீர்களா? அந்த சப்பாத்திக்கு என்ன சைடு டிஷ் செய்வதென்று யோசித்துக் கொண்டிருக்கிறீர்களா? உங்கள் வீட்டில் முட்டைக்கோஸ் உள்ளதா? அப்படியானால் அந்த முட்டைக்கோஸ் கொண்டு அட்டகாசமான சுவையில் கூட்டு செய்யுங்கள்.

இந்த முட்டைக்கோஸ் கூட்டு சப்பாத்தியுடன் மட்டுமின்றி, சாதத்துடன் சாப்பிடவும் அற்புதமாக இருக்கும். முக்கியமாக இந்த முட்டைக்கோஸ் கூட்டு குழந்தைகள் விரும்பி சாப்பிடக்கூடியவாறு இருக்கும். அதோடு வேலை முடிந்து வீட்டிற்கு வந்ததும் வேகமாக செய்யக்கூடிய வகையில் சுலபமாகவும் இருக்கும்.

உங்களுக்கு முட்டைக்கோஸ் கூட்டு எப்படி செய்வதென்று தெரிந்து கொள்ள வேண்டுமா? கீழே முட்டைக்கோஸ் கூட்டு ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பாசிப்பருப்பு - 1/2 கப்
* துவரம் பருப்பு - 1/2 கப்
* முட்டைக்கோஸ் - 1 (பொடியாக நறுக்கியது)
* மஞ்சள் தூள் - 1/2 டீஸ்பூன்
* உளுத்தம் பருப்பு - 3 டேபிள் ஸ்பூன்
* சீரகம் - 1 டேபிள் ஸ்பூன்
* துருவிய தேங்காய் - 1/2 கப்
* வரமிளகாய் - 5
* தண்ணீர் - தேவையான அளவு
* தேங்காய் எண்ணெய் - 1 டேபிள் ஸ்பூன்
* உப்பு - சுவைக்கேற்ப

தாளிப்பதற்கு..

* தேங்காய் எண்ணெய் - 1/2 டேபிள் ஸ்பூன்
* உளுத்தம் பருப்பு - 1 டீஸ்பூன்
* கடுகு - 1/2 டீஸ்பூன்
* வரமிளகாய் - 1
* கறிவேப்பிலை - சிறிது

செய்முறை:

* முதலில் முட்டைக்கோஸை பொடியாக நறுக்கி தனியாக வைத்துக் கொள்ள வேண்டும்.
* பின்னர் குக்கரில் பாசிப் பருப்பு மற்றும் துவரம் பருப்பை கழுவிப் போட்டு 1 கப் நீரை ஊற்றி அடுப்பில் வைத்து, 4 விசில் விட்டு இறக்கி, விசில் போனதும் குக்கரைத் திறந்து, நன்கு மசித்துக் கொள்ள வேண்டும்.
* பின்பு ஒரு வாணலியை அடுப்பில் வைத்து, அதில் முட்டைக்கோஸ், மஞ்சள் தூள், சுவைக்கேற்ப உப்பு சேர்த்து, குறைவான தீயில் வைத்து, சிறிது நீரைத் தெளித்து, முட்டைக்கோஸை வேக வைத்து எடுத்துக் கொள்ள வேண்டும்.
* பிறகு ஒரு வாணலியை அடுப்பில் வைத்து, அதில் 1 டேபிள் ஸ்பூன் தேங்காய் எண்ணெய் ஊற்றி சூடானதும், உளுத்தம் பருப்பு சேர்த்து பொன்னிறமாக வறுத்த பின், வரமிளகாய் சேர்த்து வறுக்க வேண்டும்.
* அடுத்து துருவிய தேங்காய் மற்றும் சீரகத்தை சேர்த்து நன்கு வறுத்து இறக்கி குளிர வைத்து, மிக்சர் ஜாரில் போட்டு சிறிது நீரை ஊற்றி நன்கு மென்மையாக அரைத்துக் கொள்ள வேண்டும்.
* பின் வேக வைத்துள்ள பருப்புடன், வேக வைத்துள்ள முட்டைக்கோஸை சேர்த்து, அதோடு அரைத்து வைத்துள்ள தேங்காய் விழுது, சுவைக்கேற்ப உப்பு சேர்த்து நன்கு கிளறி, அடுப்பில் வைத்து, குறைவான தீயில் வைத்து 2 நிமிடம் வேக வைத்து இறக்க வேண்டும்.
* இறுதியாக ஒரு சிறு வாணலியை அடுப்பில் வைத்து, அதில் 1/2 டேபிள் ஸ்பூன் தேங்காய் எண்ணெய் ஊற்றி சூடானதும், கடுகு, உளுத்தம் பருப்பு, வரமிளகாய், கறிவேப்பபிலை சேர்த்து தாளித்து, முட்டைக்கோஸ் கூட்டுடன் சேர்த்து நன்கு கிளறினால், சுவையான முட்டைக்கோஸ் கூட்டு தயார்.

Image Courtesy: masalachilli