சுவையான மாலை நேர ஸ்நாக்ஸ்... பிரட் வெஜிடேபிள் கட்லெட்

உங்கள் வீட்டில் உள்ளோர் மாலை வேளையில் நல்ல சுவையான ஸ்நாக்ஸ் ஏதாவது செய்து கொடுக்க சொல்கிறார்களா? என்ன செய்வது என்று யோசித்துக் கொண்டிருக்கிறீர்களா? உங்கள் வீட்டில் இருப்போர் கட்லெட்டுகளை விரும்பி சாப்பிடுவார்களா? உங்கள் வீட்டில் பிரட் மற்றும் காய்கறிகள் உள்ளதா? அப்படியானால் அவற்றைக் கொண்டு சுவையான பிரட் வெஜிடேபிள் கட்லெட் செய்து கொடுங்கள். இந்த கட்லெட் செய்வது மிகவும் ஈஸி. முக்கியமாக இது பெரியோர்கள் முதல் குழந்தைகள் வரை விரும்பி சாப்பிடும் வகையில் இருக்கும்.

உங்களுக்கு பிரட் வெஜிடேபிள் கட்லெட் எப்படி செய்வதென்று தெரிந்து கொள்ள வேண்டுமா? கீழே பிரட் வெஜிடேபிள் கட்லெட் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பிரட் - 7 துண்டுகள்

* எண்ணெய் - 1 டீஸ்பூன் + பொரிப்பதற்கு தேவையான அளவு

* சோம்பு - 1 டீஸ்பூன்

* பெரிய வெங்காயம் - 1 (பொடியாக நறுக்கியது)

* பச்சை மிளகாய் - 1 (பொடியாக நறுக்கியது)

* இஞ்சி பூண்டு பேஸ்ட் - 1 டீஸ்பூன்

* கேரட் - 1 (துருவியது)

* பீன்ஸ் - 3 (பொடியாக நறுக்கியது)

* முட்டைக்கோஸ் - 1/2 கப் (பொடியாக நறுக்கியது)

* மிளகாய் தூள் - 1 டீஸ்பூன்

* சீரகத் தூள் - 1/2 டீஸ்பூன்

* மல்லித் தூள் - 2 டீஸ்பூன்

* கரம் மசாலா - 1 டீஸ்பூன்

* உப்பு - சுவைக்கேற்ப

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், சோம்பு சேர்த்து தாளிக்க வேண்டும்.

* பின் அதில் வெங்காயம், பச்சை மிளகாய் சேர்த்து பொன்னிறமாக வதக்க வேண்டும்.

* பின்பு அதில் இஞ்சி பூண்டு பேஸ்ட் சேர்த்து பச்சை வாசனை போக வதக்க வேண்டும்.

* பிறகு அதில் காய்கறிகளை சேர்த்து, சிறிது உப்பு தூவி, காய்கறிகளை வேக வைக்க வேண்டும்.

* காய்கறிகள் வெந்ததும், அதில் மசாலா பொடிகளை சேர்த்து நன்கு கிளறி இறக்க வேண்டும்.

* அடுத்து பிரட் துண்டுகளை எடுத்து, நீரில் நனைத்து, பிழிந்துவிட்டு, பின் அந்த பிரட்டை ஒரு பௌலில் உலர்த்திக் கொள்ள வேண்டும்.

* பின் அதில் வதக்கி வைத்துள்ள காய்கறிகளை சேர்த்து நன்கு பிசைய வேண்டும்.

* பின்பு அவற்றை சிறு உருண்டைகளாக உருட்டி, தட்டையாக தட்டிக் கொள்ள வேண்டும்.

* இறுதியாக ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடானதும், தட்டி வைத்துள்ள கட்லெட்டுகளை சேர்த்து பொன்னிறமாக பொரித்து எடுத்தால், சுவையான பிரட் வெஜிடேபிள் கட்லெட் தயார்.

Image Courtesy: yummytummyaarthi