4 பிரட்டும், 1 முட்டையும் இருந்தா.. ஈவ்னிங் இப்படியொரு ஸ்நாக்ஸ் செய்யுங்க.. அல்டிமேட்டா இருக்கும்..

Bread Snacks In Tamil: மாலை வேளையில் உங்கள் குழந்தைகள் ஸ்நாக்ஸ் கேட்டு நச்சரிக்கிறார்களா? உங்கள் வீட்டில் பிரட் உள்ளதா? அப்படியானால் அந்த பிரட்டை வெறுமனே சாப்பிட கொடுக்காமல், முட்டை மற்றும் பாலுடன் சேர்த்து ஒரு அட்டகாசமான சுவையைக் கொண்ட ஸ்நாக்ஸ் செய்து கொடுங்கள்.

இந்த பிரட் ஸ்நாக்ஸ் மொறுமொறுவென்று குழந்தைகள் விரும்பி சாப்பிடக்கூடியவாறு இருக்கும். முக்கியமாக இந்த ஸ்நாக்ஸ் 10 நிமிடத்தில் செய்யக்கூடியவாறு செய்வதற்கு மிகவும் சுலபமாக இருக்கும்.

உங்களுக்கு இந்த பிரட் ஸ்நாக்ஸை எப்படி செய்வதென்று தெரிந்து கொள்ள வேண்டுமா? கீழே இந்த பிரட் ஸ்நாக்ஸ் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பிரட் - 4
* முட்டை - 1
* பால் - 1/4 கப்
* உப்பு - 1/4 டீஸ்பூன்
* சர்க்கரை - 1 டீஸ்பூன்
* மஞ்சள் தூள் - 1 சிட்டிகை
* ஆரிகானோ/பிட்சா சீசனிங் - சிறிது
* கொத்தமல்லி - சிறிது (பொடியாக நறுக்கியது)
* மிளகுத் தூள் - 1/4 டீஸ்பூன்
* எண்ணெய் - பொரிப்பதற்கு தேவையான அளவு

செய்முறை:

* முதலில் பிரட் துண்டுகளை எடுத்து, அதன் ப்ரௌன் நிற முனைகளை வெட்டி தனியாக எடுத்து வைத்துக் கொள்ள வேண்டும். பின் நீக்கிய அந்த பிரட் பகுதியை மிக்சர் ஜாரில் போட்டு, நன்கு பொடித்து ஒரு தட்டில் எடுத்துக் கொள்ள வேண்டும்.
* பின்பு பிரட்டின் வெள்ளைப் பகுதியை முக்கோண வடிவில் அல்லது சதுர வடிவில் வெட்டி தனியாக வைத்துக் கொள்ள வேண்டும்.
* பிறகு ஒரு பௌலில் ஒரு முட்டையை உடைத்து ஊற்றி, அத்துடன் பால், உப்பு, சர்க்கரை, மஞ்சள் தூள், ஆரிகனோ/பிட்சா சீசனிங், பொடியாக நறுக்கிய கொத்தமல்லி, மிளகுத் தூள் ஆகியவற்றை சேர்த்து நன்கு அடித்துக் கொள்ள வேண்டும்.
* பின்னர் ஒரு பிரட் துண்டை எடுத்து, முட்டை பால் கலவையில் பிரட்டி, பின் பிரட் தூளில் பிரட்டி, ஒரு தட்டில் எடுத்து வைத்துக் கொள்ள வேண்டும். இதேப் போல் அனைத்து பிரட் துண்டுகளையும் பிரட்டி தட்டில் எடுத்து வைத்துக் கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடானதும், பிரட் தூளில் பிரட்டிய பிரட்டுகளை போட்டு முன்னும் பின்னும் பொன்னிறமாக பொரித்து எடுத்தால், சுவையான மற்றும் மொறுமொறுப்பான பிரட் ஸ்நாக்ஸ் தயார்.

Image Courtesy: Apoorvaa's Nalabagam