Beetroot Chutney Recipe : பீட்ரூட் சட்னி

பீட்ரூட்டை உணவில் அதிகம் சேர்ப்பதால், உடலில் இரத்தத்தின் அளவு அதிகரிக்கும். ஏனெனில் பீட்ருட்டில் இரும்புச்சத்து உள்ளது. இன்று உங்கள் வீட்டில் இட்லி அல்லது தோசை செய்ய திட்டமிட்டுள்ளீர்களா? அதற்கு சற்று வித்தியாசமான சைடு டிஷ் செய்ய நினைக்கிறீர்களா? உங்கள் வீட்டில் பீட்ரூட் உள்ளதா? அப்படியானால் அந்த பீட்ரூட்டைக் கொண்டு ஒரு சுவையான சட்னி செய்யுங்கள். இந்த பீட்ரூட் சட்னி இட்லி, தோசையுடன் சேர்த்து சாப்பிட அற்புதமாக இருக்கும்.

உங்களுக்கு பீட்ரூட் சட்னி எப்படி செய்வதென்று தெரிந்து கொள்ள வேண்டுமா? கீழே பீட்ரூட் சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பீட்ரூட் - 1 1/2 கப் (நறுக்கியது)

* துருவிய தேங்காய் - 1/4 கப்

வறுத்து அரைப்பதற்கு...

* எண்ணெய் - 2 டீஸ்பூன்

* உளுத்தம் பருப்பு - 2 டேபிள் ஸ்பூன்

* கடலை பருப்பு - 1 டேபிள் ஸ்பூன்

* சீரகம் - 1/2 டீஸ்பூன்

* வரமிளகாய் - 2

* பூண்டு - 2 பல்

* புளி - 1 துண்டு

தாளிப்பதற்கு...

* எண்ணெய் - 2 டீஸ்பூன்

* கடுகு - 1 டீஸ்பூன்

* கறிவேப்பிலை - சிறிது

* பெருங்காயத் தூள் - 1 சிட்டிகை

செய்முறை:

* முதலில் ஒரு கடாயை அடுப்பில் வைத்து, அதில் வறுத்து அரைப்பதற்கு கொடுத்துள்ள பொருட்களை ஒவ்வொன்றாக சேர்த்து பொன்னிறமாக வறுத்து இறக்கி குளிர வைக்க வேண்டும்.

* பின் அதே வாணலியில் பீட்ரூட்டை சேர்த்து, சிறிது உப்பு தூவி 3-5 நிமிடம் வதக்கி, மூடி வைத்து 5 நிமிடம் வேக வைத்து, பின் அதில் தேங்காய் மற்றும் பிற வறுத்த பொருட்களையும் சேர்த்து வதக்கி இறக்கி குளிர வைக்க வேண்டும்.

* வதக்கிய பொருட்கள் நன்கு குளிர்ந்ததும், அதை மிக்சர் ஜாரில் போட்டு, சிறிது நீர் ஊற்றி நன்கு அரைக்க வேண்டும். பின் அரைத்த சட்னியை ஒரு பாத்திரத்தில் எடுத்துக் கொள்ள வேண்டும்.

* பின்பு ஒரு சிறு வாணலியை அடுப்பில் வைத்து, அதில் எண்ணெய் ஊற்றி சூடானதும், தாளிப்பதற்கு கொடுத்துள்ள பொருட்களை சேர்த்து தாளித்து சட்னியுடன் சேர்த்து நன்கு கிளறினால், பீட்ரூட் சட்னி தயார்.

Image Courtesy: sharmispassions