4 வாழைப்பழமும் 1 முட்டையும் இருந்தா.. ஈவ்னிங் இட்லி தட்டில் இந்த ஸ்நாக்ஸை செய்யுங்க.. செமயா இருக்கும்...

Banana Pancake Recipe In Tamil: மாலை வேளையில் பள்ளி முடிந்து பசியுடன் வீட்டிற்கு வரும் குழந்தைகளின் பசியை போக்க, ஒரு அட்டகாசமான சுவையைக் கொண்ட ஸ்நாக்ஸ் ஏதாவது செய்து கொடுக்க நினைக்கிறீர்களா? அதுவும் எண்ணெயில் பொரிக்காமல் ஸ்நாக்ஸ் செய்ய நினைக்கிறீர்களா?

உங்கள் வீட்டில் வாழைப்பழமும், முட்டையும் இருக்கா? அப்படியானால் அவற்றைக் கொண்டு அற்புதமான சுவையில் ஒரு பேன்கேக் செய்யுங்கள். இந்த கேக் சுவையாக இருப்பதாடு, பசியையும் அடக்கும், சத்தானதும் கூட.

உங்களுக்கு வாழைப்பழ பேன்கேக்கை எப்படி செய்வதென்று தெரிந்து கொள்ள வேண்டுமா? கீழே வாழைப்பழ பேன்கேக் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* நன்கு கனிந்த வாழைப்பழம் - 4
* சர்க்கரை - 1/2 கப்
* முட்டை - 1
* உப்பு - 2 சிட்டிகை
* ஏலக்காய் தூள் - 1/4 டீஸ்பூன்
* எண்ணெய் - 1/4 கப்
* கோதுமை மாவு - 1 கப்
* பேக்கிங் பவுடர்- 1 டீஸ்பூன் அல்லது பேக்கிங் சோடா - 1/2 டீஸ்பூன்
* காய்ச்சிய பால் - 1/4 கப்
* டூட்டி ஃபுரூட்டி - சிறிது

செய்முறை:

* முதலில் ஒரு பாத்திரத்தில் நன்கு கனிந்த வாழைப்பழத்தை எடுத்து, அதை நன்கு மசித்துக் கொள்ள வேண்டும்.
* பின்னர் அதில் 1/2 கப் சர்க்கரை மற்றும் 1 முட்டையை உடைத்து ஊற்ற வேண்டும்.
* அதன் பின் அதில் உப்பு, ஏலக்காய் தூள், 1/4 கப் எண்ணெய் ஊற்றி நன்கு பீட்டர் கொண்டு கலந்து கொள்ள வேண்டும்.
* பின் அதில் கோதுமை மாவு சேர்த்து, அத்துடன் பேக்கிங் பவுடர் அல்லது பேக்கிங் சோடா சேர்த்து நன்கு கலந்து விட வேண்டும்.
* பிறகு அதில் காய்ச்சி குளிர வைத்துள்ள பாலை 1/4 கப் ஊற்றி நன்கு கட்டிகளின்றி கிளறி விட வேண்டும்.
* பின்பு ஒரு நான்ஸ்டிக் கடாய் அல்லது இட்லி பாத்திரத்தை அடுப்பில் வைத்து, அதனுள் ஒரு ஸ்டாண்ட்டை வைத்து, மூடி வைத்து, குறைவான தீயில் வைத்து 10 நிமிடம் சூடேற்ற வேண்டும்.
* பின் ஒரு இட்லி தட்டை எடுத்து, அதன் குழிகளில் எண்ணெய் தடவி, கலந்து வைத்துள்ள மாவை ஊற்றி, மேலே சிறிது டூட்டி ஃபுரூட்டியைத் தூவி, கடாய் அல்லது இட்லி பாத்திரத்தில் வைத்து, 20-25 நிமிடம் குறைவான தீயில் வைத்து மூடி வைத்து வேக வைக்க வேண்டும்.
* 20-25 நிமிடம் கழித்து மூடியைத் திறந்து, டூத் பிக் கொண்டு வெந்துவிட்டதா என்று பார்த்து, வெந்துவிட்டால், அதை இறக்கி 5-10 நிமிடம் குளிர வைத்து, பின் கரண்டியால் எடுத்தால், சுவையான வாழைப்பழ பேன்கேக் தயார்.