ஆந்திரா ஸ்டைல் கோங்குரா புளியோதரை ரெசிபி - இந்த மாதிரி புளி சாதம் செஞ்சு பாருங்க -வித்தியாசமா செமையா இருக்கும்

Andhra Gongura Puliyodharai Recipe in Tamil: ஒவ்வொரு நாளும் என்ன சமைப்பது என்பதுதான் பெரும்பாலான பெண்களுக்கு இருக்கும் ஒரே பிரச்சினை. தினமும் ஒரே மாதிரியான குழம்பு செய்து போரடித்துவிட்டதா? அவ்வப்போது சற்று வித்தியாசமான ரெசிபிக்களை வீட்டில் செய்து சுவைக்க விரும்புவீர்களா? அப்படியென்றால் ஆந்திரா ஸ்டைலில் ஒருமுறை கோங்குரா புளியோதரையை முயற்சி செய்து பாருங்கள். வழக்கமாக புளியோதரை என்றால் அதை புளியை வைத்து ஒரே மாதிரிதான் செய்வோம். ஆனால் இந்த ஆந்திரா ஸ்டைல் கோங்குரா புளியோதரை முற்றிலும் வித்தியாமான சுவையில் இருக்கும்.

பொதுவாக ஆந்திரா ஸ்டைல் ரெசிபி என்றாலே கொஞ்சம் வித்தியாசமாக இருக்கும் என்று கூறுவார்கள். இந்த கோங்குரா புளியோதாரையும் அதற்கு விதிவிலக்கல்ல. சாம்பார், புளிக்குழம்பு என்று சாப்பிட்டு போரடித்தவர்களுக்கு இந்த அட்டகாசமான கோங்குரா புளியோதரை வித்தியாசமான அனுபவத்தைக் கொடுக்கும். இந்த ஸ்டைல் புளியோதரை செய்வதற்கு எளிதானது, இதன் சுவையும் மிகவும் தனித்துவமானதாக இருக்கும்.

உங்களுக்கு ஆந்திரா ஸ்டைல் கோங்குரா புளியோதரையை எப்படி செய்வதென்று தெரிந்து கொள்ள வேண்டுமா? கீழெ ஆந்திரா கோங்குரா புளியோதரை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

- 2 கப் வேகவைத்த சாதம்
- ¼ ஸ்பூன் மஞ்சள் தூள்
- தேவையான அளவு உப்பு
- 1 ஸ்பூன் நல்லெண்ணெய்
- சிறிதளவு கறிவேப்பிலை

அரைக்க தேவையானவை:

- 2 கப் கோங்குரா(புளிச்சக்கீரை)
- 1 ஸ்பூன் நல்லெண்ணெய்
- 1 ஸ்பூன் கடுகு
- ¼ ஸ்பூன் வெந்தயம்
- 2 வர மிளகாய்

தாளிக்க:

- 2 ஸ்பூன் நல்லெண்ணெய்
- 1 ஸ்பூன் கடுகு
- 1 ஸ்பூன் சீரகம்
- 1 ஸ்பூன் உளுத்தம் பருப்பு
- 2 ஸ்பூன் கடலைப்பருப்பு
- 2 ஸ்பூன் வறுத்த வேர்க்கடலை
- 2 பச்சை மிளகாய் (நீளமாக கீறியது)
- 3 வர மிளகாய் (கிள்ளியது)
- ஒரு சிட்டிகை பெருங்காயம்
- 2 கொத்து கறிவேப்பிலை

செய்முறை:

- சமைத்த சாதத்தை ஒரு தட்டில் பரப்பி வைக்கவும். அது முழுமையாக ஆறிய பிறகு, அதில் மஞ்சள் தூள், எண்ணெய், உப்பு மற்றும் கறிவேப்பிலை ஆகியவற்றைச் சேர்த்து, சாதம் குழைந்துவிடாதவாறு மென்மையாகக் கிளறவும்.

- ஒரு வாணலியில் எண்ணெய் ஊற்றிச் சூடாக்கவும். கடுகு சேர்த்து, அது வெடிக்கத் தொடங்கியதும், வெந்தயத்தைச் சேர்த்து லேசான சிவப்பு நிறமாகும் வரை வதக்கவும்.

- அதன் பின் வர மிளகாய் மற்றும் கோங்குராவைச் சேர்த்து, அது மென்மையாகும் வரை வதக்கவும். கீரை மென்மையாவதற்கு கிட்டதட்ட 8 நிமிடங்கள் ஆகலாம்.

- வதக்கிய இலைகள் ஆறும் வரை காத்திருக்கவும். பிறகு, அவற்றை மிக்ஸி ஜாரில் போட்டு, சற்று கொரகொரப்பான விழுதாக அரைத்துக்கொள்ளவும்.

- ஒரு வாணலியில் நல்லெண்ணெயை ஊற்றவும். அதில் கடுகு மற்றும் சீரகம் சேர்த்து, அவை பொரியும் வரை காத்திருக்கவும்.

- பின்னர் உடைத்த உளுத்தம் பருப்பு, கடலைப்பருப்பு மற்றும் வறுத்த நிலக்கடலை ஆகியவற்றைச் சேர்த்து, பருப்பு பொன்னிறமாகும் வரை வதக்கவும். அதன் பின் பச்சை மிளகாய், காய்ந்த மிளகாய், கறிவேப்பிலை மற்றும் பெருங்காயம் ஆகியவற்றைச் சேர்த்து, அடுப்பை அணைத்துவிடவும்.

- தயார் செய்து வைத்துள்ள சாதத்தில் இந்த தாளிப்பைச் சேர்க்கவும். அதனுடன் கோங்குரா விழுதையும் சேர்த்து, சாதம் குழைந்துவிடாதவாறு மென்மையாகக் கிளறி நன்கு கலந்துகொள்ளவும்.

- அவ்வளவுதான் சுவையான ஆந்திரா ஸ்டைல் கோங்குரா புலாவ் ரெடி. இதை அப்பளம் மற்றும் உருளைக்கிழங்கு பொரியலுடன் பரிமாறவும்.