நீல் ஆம்ஸ்ட்ராங் நிலாவிலிருந்து ரகசியமாக கொண்டுவந்த பொருட்கள் இப்ப கிடைச்சிருக்கு - அதுல என்னென்ன இருக்கு?

மனித குலத்தின் வரலாற்றை மாற்றிய முக்கியமான நிகழ்வுகளில் ஒன்று அமெரிக்காவின் நிலவுப் பயணம். 1969 ஆம் ஆண்டு அப்பல்லோ 11 திட்டம் மூலம் நிலவிற்கு ஒரு குழு பயணித்தது. அந்த குழுவுடன் பயணித்த நீல் ஆம்ஸ்ட்ராங் ஜூலை 20, 1969-ல் நிலவில் தரையிறங்கிய முதல் மனிதர் என்ற மாபெரும் சாதனையைப் படைத்தார். இது அவருக்கு அழியாப்புகழை பெற்றுத்தந்தது.

2012-ல் நீல் ஆம்ஸ்ட்ராங்கின் மரணமடைந்ததைத் தொடர்ந்து, 2014-ல் அவரது மனைவி, தங்கள் படுக்கையறை அலமாரியில் நிலவில் தரையிறங்கிய பொது ஆம்ஸ்ட்ராங் எடுத்துவந்த சில பொருட்கள் மறைத்து வைக்கப்பட்டிருந்ததைக் கண்டுபிடித்தார். இந்த தொகுப்பு பொதுவாக 'மெக்டிவிட் பர்ஸ்' என்று அழைக்கப்படுகிறது.

நீல் ஆம்ஸ்ட்ராங் மற்றும் பஸ் ஆல்ட்ரின் ஆகியோர் அப்பல்லோ 11 விண்கலத்திலிருந்து அறிவியல் ஆய்வுக்காக சுமார் 21.5 கிலோகிராம் நிலாக் கற்களையும் மண்ணையும் பூமிக்குக் கொண்டு வந்தபோதிலும், எடையைக் குறைப்பதற்காக நிலவில் அப்புறப்படுத்த வேண்டியிருந்த பல பொருட்களை நீல் ஆம்ஸ்ட்ராங் தனது தனிப்பட்ட சேகரிப்பாக வைத்திருந்தார்.

இந்த தொகுப்பில், நிலவில் நடந்த முதல் நிகழ்வைப் பதிவுசெய்த கேமராவும் அடங்கியிருந்தது. கிட்டதட்ட 45 ஆண்டுகளாக, நாசாவும் பொதுமக்களும், ஏன் அவரின் குடும்பத்தினர் கூட இந்த பொருட்களின் இருப்பைப் பற்றி முற்றிலும் அறியாமல் இருந்தனர். தற்போது மீட்கப்பட்டுள்ள இந்த பொருட்கள், மனிதகுலம் மற்றொரு உலகில் எடுத்து வைத்த முதல் அடிகளுக்கான விலைமதிப்பற்ற இணைப்புகளாகவும், அதிகாரப்பூர்வ அறிவியலுக்கும் தனிப்பட்ட வரலாற்றுக்கும் இடையிலான ஒரு பாலமாகவும் வரலாற்றுப் பொக்கிஷங்களில் இப்போது சேர்க்கப்பட உள்ளன.

நீல் ஆம்ஸ்ட்ராங் நிலவிலிருந்து எடுத்து வந்த பொருட்கள்

நீல் ஆம்ஸ்ட்ராங் நிலவிலிருந்து எடுத்து வந்த குறிப்பிடத்தக்க பொருட்களில் முதன்மையானதாக இருப்பது 10மிமீ லென்ஸ் பொருத்தப்பட்ட 16மிமீ தரவுப் பதிவுக் கேமரா( Data Acquisition Camera) ஆகும். ஸ்மித்சோனியன் தேசிய வான் மற்றும் விண்வெளி அருங்காட்சியகம் வெளியிட்ட அறிக்கையின் படி, இந்தக் கேமரா 'ஈகிள்' என்ற நிலவு கலத்தின் ஜன்னலில் பொருத்தப்பட்டு, நிலவின் மேற்பரப்பில் இறங்கியதன் புகழ்பெற்ற காட்சியையும்; நிலவில் தரையிறங்கியதையும் மற்றும் ஆம்ஸ்ட்ராங்கின் முதல் அடிகளையும் பதிவு செய்தது. தேசிய வான் மற்றும் விண்வெளி அருங்காட்சியகத்தின்படி, இதுவரை கண்டெடுக்கப்பட்ட விண்வெளி உபகரணங்களில் இந்தக் கேமரா மிகவும் முக்கியமான ஒன்றாகும்.

'மெக்டிவிட் பர்ஸ்' கண்டுபிடிப்பு

இந்த பொருள்கள், அப்பல்லோ 9 கமேண்டர் ஜேம்ஸ் மெக்டிவிட்டின் நினைவாக 'மெக்டிவிட் பர்ஸ்' என்று அழைக்கப்பட்ட ஒரு தற்காலிக சேமிப்புப் பையில்(Temporary Stowage Bag) கண்டெடுக்கப்பட்டன. ஆம்ஸ்ட்ராங்கின் மனைவி தனது கணவரின் அலமாரியைச் சுத்தம் செய்துகொண்டிருந்தபோது அந்த பையைக் கண்டெடுத்தார். அது ஒரு வெள்ளை நிறத் துணிப் பையாக இருந்தது, அதில் விமானப் பயணத்திற்கான வன்பொருள் போலத் தோற்றமளிக்கும் பொருள்கள் இருந்தன. பயணக் குறிப்புகளில், ஆம்ஸ்ட்ராங் அந்தப் பையை, 'நாங்கள் எங்களுடன் எடுத்துவந்த குப்பைக் குவியல், LM-இன் பாகங்கள், இதர பொருள்கள்' என்று குறிப்பிட்டு வைத்துள்ளார்.

அந்த பையில் சில தனிப்பட்ட உபகரணங்களும், உயிர் காக்கும் கருவிகளும் இருந்தன

ஸ்மித்சோனியன் தேசிய விமான மற்றும் விண்வெளி அருங்காட்சியகம் கூறியுள்ள படி, அந்த பையில் மொத்தமாக 18 பொருட்கள் இருந்தன. அவற்றுள், ஓய்வு நேரத்தில் தன் கால்களுக்கு ஆதரவளிக்க ஆம்ஸ்ட்ராங் பயன்படுத்திய ஒரு இடுப்புக் கயிறு, பயன்பாட்டு விளக்குகள் மற்றும் அவற்றின் நீட்டிப்புக் கம்பிகள், ஒரு விளக்குத் தாங்கி, மற்றும் ஒரு அவசரகால குறடு ஆகியவை அடங்கும். அவை 'குப்பை'யாக இருந்தபோதிலும், இந்தப் பொருட்கள் பாதுகாக்கப்பட்டிருப்பது, முதல் தரையிறக்கத்தின்போது பயன்படுத்தப்பட்ட, செயல்படும் நிலையில் இருந்த கருவிகளைப் பற்றிய புரிதலை வழங்குகிறது.

நிலவின் மாதிரிகள் மற்றும் அறிவியல் தரவுகள்

அந்த இரகசியப் பையைத் தவிர, ஆம்ஸ்ட்ராங் மற்றும் ஆல்ட்ரின் இருவரும் 21.5 கிலோகிராம் நிலவுப் பொருட்களை சேகரித்து அதிகாரப்பூர்வமாகப் பூமிக்கு கொண்டு வந்தனர். இந்த மொத்த அளவில், ஒரு பகுதி 'தற்காலிக மாதிரி'யாகச் சேகரிக்கப்பட்டது. இதன் நோக்கம், சிறிதளவு சந்திரப் பொருட்கள் பூமிக்குத் திரும்புவதை உறுதி செய்வதாகும். அதே சமயம், இந்த மாதிரிகளின் பெரும்பகுதி பின்னர் சேகரிக்கப்பட்டது. அப்பல்லோ 11 அறிவியல் அறிக்கையின்படி, மற்றொரு விண் பொருளிலிருந்து மனிதக் கையால் சேகரிக்கப்பட்ட முதல் புவியியல் மாதிரிகள் இவைதான். இவை நிலவு பற்றிய அடுத்தகட்ட ஆய்வுகளுக்கு அடித்தளமிட்டன.

நீல் ஆம்ஸ்ட்ராங்கின் பர்ஸில் இருந்த பொருட்கள்:

- 16 மிமீ தரவு சேகரிப்பு கேமரா (மௌரர்)
- 10 மிமீ லென்ஸ்
- 16 மிமீ ஃபிலிம் மேகசின்கள் (2)
- இடுப்புக் கயிறு
- மின்சாரக் கம்பிகளுடன் கூடிய பயன்பாட்டு விளக்குகள் (2)
- ஈவிஏ விளக்கு
- அவசரக்கால ரெஞ்ச் (கருவி B)
- COAS மவுண்ட்
- Right-Angle Brackets (2)
- வடிகட்டி
- உதிரி பல்பு
- மின்சாரக் கம்பிகள்
- கண் பாதுகாப்பு கருவி
- Utility Brackets