உலகில் மக்கள் வாழ தகுதியற்ற மோசமான 10 நாடுகள்... இந்தியா எத்தனாவது இடத்தில் இருக்கு தெரியுமா?

Top 10 Worst Countries in the World: உலகில் தற்போது 195 நாடுகள் உள்ளன, ஆனால் இந்த அனைத்து நாடுகளும் ஒரே மாதிரியான வாழ்க்கைத் தரத்தையும், பொருளாதாரத்தையும் கொண்டிருக்கவில்லை. சில நாடுகள் கடுமையான பொருளாதார சிக்கலையும், மக்கள் வாழ்வதற்கு தகுதியற்ற சூழலையும் கொண்டுள்ளது. ஆனால், அவற்றின் மோசமான தன்மையின் அடிப்படையில் நாடுகளை எவ்வாறு தரவரிசைப்படுத்துவது?

The Fragile States Index(FSI), உலகெங்கிலும் உள்ள நாடுகளை பாதுகாப்பு அச்சுறுத்தல், பொருளாதாரக் கட்டுப்பாடு, மனித உரிமை மீறல்கள், பொதுத்துறை, அகதிகளின் நிலை மற்றும் பல சிக்கல்களின் அடிப்படையில் தரவரிசைப்படுத்தும் வருடாந்திர தரவரிசை அமைப்பாகும். இதில் அதிக மதிப்பெண் உள்ள நாடு மிகவும் பலவீனமானது மற்றும் பாதுகாப்பற்றது. இந்த அறிக்கையின் அடிப்படையில் மக்கள் வாழ பாதுகாப்பு இல்லாத மற்றும் உலகின் மோசமான நாடுகள் என்னென்ன என்று இந்த பதிவில் தெரிந்து கொள்ளலாம்.

சோமாலியா

உலகின் மிக மோசமான நாடுகளின் பட்டியலில் சோமாலியா முதலிடத்தில் உள்ளது. சோமாலியா, அதிக FSI மதிப்பெண் 111.3-யை பெற்றுள்ளது. உள்ளூர் மக்களுக்கு பாதுகாப்பின்மை, தீவிரவாத குழுக்களுடனான தொடர்ச்சியான மோதல், மோசமான நிர்வாகம் மற்றும் அவ்வப்போது ஏற்படும் நெருக்கடிகள் இங்கு வாழ்க்கைத் தரத்தை மோசமாக்கியுள்ளன. மக்களுக்கிடையே நிலவும் பிரிவினைகள், கடற்கொள்ளை மற்றும் வறட்சி போன்ற இயற்கை பேரழிவுகள் பிரச்சினையை அதிகரிக்கின்றன.

சூடான்

உலகின் இரண்டாவது மோசமான நாடாக சூடான், FSI தரவரிசையில் 109.3 மதிப்பெண் பெற்றுள்ளது, இங்கு நிலவும் அண்டை நாடுகளுடனான மோதல் மற்றும் அரசியல் உறுதியற்ற தன்மையே இதற்கு காரணமாகும். இராணுவப் படைகளுக்கு இடையேயான வன்முறையின் சமீபத்திய அதிகரிப்பு, மக்களின் இடப்பெயர்ச்சி, பொருளாதாரச் சரிவு மற்றும் மனிதாபிமான நெருக்கடிகள் நிலையை மேலும் மோசமாக்குகின்றன.

தெற்கு சூடான்

தெற்கு சூடானின் FSI மதிப்பெண் 109.0 ஆகும். உள்நாட்டுப் போர், இன மோதல் மற்றும் பொருளாதார நெருக்கடி ஆகியவற்றால் இந்த நாடு மோசமாக பாதிக்கப்பட்டுள்ளது. மேலும் வெள்ளம், பசி மற்றும் அரசியல் உறுதியற்ற தன்மை போன்ற பிரச்சினைகள் நாட்டை மிகவும் பாதித்துள்ளன.

சிரியா

சிரியாவின் FSI மதிப்பெண் 108.1 ஆக உள்ளது, இதற்கு உள்நாட்டுப் போரினால் ஏற்பட்ட அழிவே காரணம். இந்த உள்நாட்டு போர் மில்லியன் கணக்கான மக்களை நாட்டை விட்டு வெளியேற வைத்துள்ளது, நாட்டின் உள்கட்டமைப்பை அழித்துள்ளது, மேலும் நாட்டை பல்வேறு குழுக்களாகப் பிரித்துள்ளது. தொடர்ச்சியான வன்முறை, வெளிநாட்டு தலையீடுகள் மற்றும் மோசமான பொருளாதாரம் ஆகியவை இங்கு நிலைமையை மேலும் மோசமாக்குகின்றன.

காங்கோ

காங்கோ ஜனநாயகக் குடியரசு FSI மதிப்பெண் 106.7 பெற்றுள்ளது மற்றும் உலகின் மிக மோசமான நாடுகளின் பட்டியலில் ஐந்தாவது இடத்தில் உள்ளது. குறிப்பாக நாட்டின் கிழக்குப் பகுதிகளில் தொடர்ந்து நடைபெறும் ஆயுத மோதல்களால் நிலை மோசமடைந்துள்ளது. மோசமான நிர்வாகம், ஊழல் மற்றும் உலகின் அதிக எண்ணிக்கையில் மக்கள் வெளியேறிய நாடுகளில் ஒன்றாக இது உள்ளது. வளர்ச்சியடையாத உள்கட்டமைப்பு மற்றும் தொற்றுநோய்கள் மக்களின் வாழ்வை மேலும் கேள்விக்குறியாக்குகின்றன.

ஏமன்

ஏமனின் FSI தரவரிசை 106.6 ஆக இருப்பதற்கு அங்கு நிலவும் உள்நாட்டுப் போர், வெளிநாடுகளின் தலையீடு மற்றும் பஞ்சம் ஆகியவற்றால் ஏற்பட்ட விளைவுகளே காரணமாகும். சுகாதாரப் பாதுகாப்பு, கல்வி மற்றும் பொருளாதார அமைப்புகளின் அடிப்படையில் நாட்டின் நிலை தொடர்ந்து மோசமடைந்து வருகிறது.

ஆப்கானிஸ்தான்

பல ஆண்டுகளாக நடந்து வரும் மோதல்கள், அரசியல் ஸ்திரமின்மை மற்றும் பொருளாதார பிரச்சினைகள் ஆகியவற்றால் பாதிக்கப்பட்ட ஆப்கானிஸ்தானின் FSI மதிப்பெண் 103.9 ஆகும். தாலிபான்கள் நாட்டின் ஆட்சியை கைப்பற்றிய பிறகு நிலை மேலும் மோசமடைந்து வருகிறது.

மத்திய ஆப்பிரிக்க குடியரசு

மத்திய ஆப்பிரிக்கக் குடியரசின் FSI மதிப்பெண் 103.9, ஆயுதக் குழுக்களுக்கு இடையேயான அதன் நீண்டகால மோதலால் மக்களிடையே கடும் வரை நிலவுகிறது. இங்கு மக்களின் அடிப்படைத் தேவைகளை பூர்த்தி செய்வதே மிகவும் சவாலாக உள்ளது.

ஹைதி

103.5 மதிப்பெண்ணுடன், மிகவும் பலவீனமான நாடாக ஹைதி உள்ளது. அரசியல் ஸ்திரமின்மை, இனக்குழுக்களிடையே நிலவும் போர், இயற்கை பேரழிவுகள் மற்றும் வறுமை ஆகியவற்றால் இந்த நாடு கடுமையாக பாதிக்கப்பட்டுள்ளது, இதன் விளைவாக பொது ஒழுங்கு மற்றும் அடிப்படை சேவைகளில் மிகப்பெரிய சரிவு ஏற்பட்டுள்ளது, இது பெருமளவிலான இடம் பெயர்வு மற்றும் மனிதாபிமான தேவையையும் ஏற்படுத்துகிறது.

சாட்

உலகின் மோசமான நாடுகளின் பட்டியலில் பத்தாவது இடத்தில் சாட் 102.7 என்ற FSI மதிப்பெண்ணுடன் முடிவடைகிறது. இந்த மத்திய ஆப்பிரிக்க நாட்டில் நிலவும் வறுமை, உறுதியற்ற தன்மை, பலவீனமான நிர்வாகம் மற்றும் காலநிலை மாற்றங்கள் இந்த நாட்டை மக்கள் வாழ தகுதியில்லாத நாடுகளில் ஒன்றாக மாற்றுகிறது.

இந்தியா

இந்தியா இந்த கணக்கெடுப்பில் 72.3 மதிப்பெண் பெற்றுள்ளது. கடந்த ஆண்டை ஒப்பிடும்போது இந்த மதிப்பெண் சற்று வீழ்ச்சியடைந்துள்ளது. இந்தியாவின் மதிப்பெண் சுமாரானது முதல் மோசமான நாட்டின் எல்லைக்குள் உள்ளது.