ஒட்டகங்கள் பல மாதங்கள் சாப்பிடாமல் இருந்தாலும் உயிருடன் இருக்க காரணம் இந்த உறுப்புதானாம்...!

நம் பூமியில் வாழும் ஒவ்வொரு உயிரினங்களும் ஒரு தனித்துவமான திறனும், சக்தியும் கொண்டவை. பாலைவனம் என்றாலே அனைவருக்கும் முதலில் ஒட்டகங்கள்தான். ஒட்டகங்கள் பூமியின் மிகவும் கடினமான மற்றும் உறுதியான மிருகங்களில் ஒன்றாகும். அவை பாலைவனத்தின் மோசமான சூழல்களில் கூட வாழக்கூடியவை.

பெரும்பாலும் பூமியின் வறண்ட பகுதிகளில் வாழும் இவை தனித்துவமான அம்சங்களையும், திறன்களையும் கொண்டுள்ளன, அவை ஒட்டகங்களை மற்ற மிருகங்களிடமிருந்து வேறுபடுத்துகின்றன. அவற்றின் உடல் பண்புகள் முதல் உணவுப் பழக்கம் வரை, ஒட்டகங்கள் பல தனித்துவமான அம்சங்களைக் கொண்டுள்ளன. பூமியின் உறுதியான விலங்கான ஒட்டகம் பற்றிய சில சுவாரஸ்யமான விஷயங்களை இந்த பதிவில் தெரிந்து கொள்ளலாம்.

ஒட்டகத்தின் திமில்லில் இருப்பது தண்ணீர் அல்ல

ஒட்டகங்களைப் பற்றி பல ஆண்டுகளாக உலவி வரும் கட்டுக்கதை, என்னவெனில் ஒட்டகங்கள் அவற்றின் திமில்களில் தண்ணீரைச் சேமித்து வைக்கின்றன. ஆனால் உண்மையில் ஒட்டகத்தின் திமில்கள் கொழுப்பால் நிரம்பியுள்ளன, உணவு கிடைப்பது கடினமாக இருக்கும்போது ஒட்டகம் ஆற்றலுக்காக இந்த கொழுப்பைப் பயன்படுத்துகிறது.

கொழுப்பு தீர்ந்து போகும்போது, திமில் சுருங்குகிறது அல்லது தொங்குகிறது. இந்த புத்திசாலித்தனமான அமைப்பு ஒட்டகங்கள் நீண்ட காலம் சாப்பிடாமல் வாழ உதவுகிறது, இதனால் உணவு கிடைக்காத கடுமையான சூழல்களில் அவை உயிர் வாழ்கின்றன.

பல மாதங்கள் உணவின்றி வாழக்கூடும்

ஒட்டகங்களின் திமில்களில் ஆற்றல் நிறைந்த கொழுப்பைச் சேமித்து வைக்கப்படுவதால், அவற்றால் பல மாதங்கள் உணவின்றி வாழ முடியும். உணவு பற்றாக்குறையாக இருக்கும்போது, அவற்றின் உடல்கள் மெதுவாக இந்தக் கொழுப்பை உடைத்து, அவற்றைத் தொடர்ந்து இயங்க வைக்கின்றன. இந்த சக்திவாய்ந்த திறன் ஒட்டகங்கள் பாலைவனங்களில் நீண்ட தூரம் பயணிக்க அல்லது தாவரங்கள் கிடைப்பது கடினமாக இருக்கும்போதும் உயிர்வாழ அனுமதிக்கிறது, மேலும் அவை விரைவாக பலவீனமடையாமல் பாதுகாக்கிறது.

மூன்று வகையான ஒட்டகங்கள் உள்ளன

ஆச்சரியமளிக்கும் விதமாக, ஒட்டகங்களில் மூன்று வகையான ஒட்டகங்கள் உள்ளன. அவை டிரோமெடரி, பாக்டிரியன் மற்றும் வைல்ட் பாக்டிரியன். டிரோமெடரி வகை ஒட்டகங்களுக்கு ஒரு திமில் உள்ளது மற்றும் உலகம் முழுக்க 90% காணப்படும் ஒட்டகங்கள் இந்த இனத்தை சேர்ந்தவைதான். பாக்டிரியன் ஒட்டகங்கள் இரண்டு திமில்களைக் கொண்டுள்ளன மற்றும் இவை குளிர்ந்த பாலைவனங்களில் வாழ்கின்றன. வைல்ட் பாக்டிரியன் என்பது வடமேற்கு சீனா மற்றும் மங்கோலியாவின் தொலைதூரப் பகுதிகளில் காணப்படும் ஒரு அரிய மற்றும் மிகவும் அழிந்து வரும் இன ஒட்டகமாகும். ஒவ்வொரு வகை ஒட்டகமும் தனித்துவமான திறன்களைக் கொண்டுள்ளன.

பிறக்கும்போது திமில்கள் இருக்காது

ஒட்டகங்கள் பிறக்கும் போது திமில்கள் இல்லாமல் பிறக்கின்றன, ஏனெனில் திமில்களை உருவாக்கும் கொழுப்புகள் உருவாக குறிப்பிட்ட காலம் தேவைப்படும். வழக்கமாக அவை ஒட்டங்கள் பிறந்த 10 மாதத்திலிருந்து வளரத் தொடங்கும். திமில்கள் இல்லாவிட்டாலும், ஒட்டகக் குட்டிகள் வியக்கத்தக்க வகையில் வலிமையானவை, அவை பொதுவாக பிறந்த ஒரு மணி நேரத்திற்குள் நடக்க முடியும். அவற்றின் இனம் மற்றும் பாலினத்தைப் பொறுத்து, ஒட்டகங்கள் மூன்று முதல் ஏழு வயதுக்குள் முழுமையாக வளரும்.

தண்ணீர் குடிக்காமல் வாழக்கூடும்

ஒட்டகங்களை மிகவும் வலிமையான மிருகங்களில் ஒன்றாக மாற்றும் திறன் என்னவெனில், அவை தண்ணீரின்றி வாரக்கணக்கில் உயிர்வாழக்கூடும். அவற்றின் உடல்கள் தண்ணீரைச் சேமிக்கும் வகையில் கட்டமைக்கப்பட்டுள்ளன, மேலும் திரவ இழப்பைக் குறைக்க மிகவும் செறிவூட்டப்பட்ட சிறுநீரை உற்பத்தி செய்யும் சிறுநீரகங்கள் உள்ளன. ஒட்டகங்கள் தண்ணீரைக் கண்டுபிடிக்கும்போது, அவை மிக விரைவாக நிறைய தண்ணீரைக் குடிக்கலாம், ஆச்சரியமளிக்கும் விதமாக சில நேரங்களில் மூன்று நிமிடங்களுக்குள் 200 லிட்டர் வரை குடிக்கக்கூடும்.