Diwali 2024: தீபாவளியின் போது இரத்த சர்க்கரை அதிகரிக்காமல் இனிப்புகளை எப்படி ஜாலியா சாப்பிடலாம் தெரியுமா?

Diwali 2024: இந்திய மக்கள் அனைவரும் மகிழ்ச்சியாக கொண்டாடும் தீபாவளிப் பண்டிகை நெருங்கிவிட்டது. தீபாவளியில் பட்டாசுகளுக்கு அடுத்து பிரதானமாக இருப்பது இனிப்புகள்தான். எவ்வளவு கடுமையான டயட்டில் இருப்பவர்கள் கூட இப்போது அவர்களின் டயட்டை தளர்த்திக் கொள்வார்கள். குறிப்பாக சர்க்கரை நோய் உள்ளவர்கள் இந்த காலகட்டத்தில் எந்த கட்டுப்பாடுகளும் இன்றி இனிப்புகளை விளாசுவார்கள்.

இது அவர்களின் ஆரோக்கியத்தில் எதிர்மறையான பாதிப்புகளை ஏற்படுத்தும். நல்ல செய்தி என்னவென்றால், ஆரோக்கியமான இரத்த சர்க்கரை அளவை பராமரிக்க நீங்கள் இனிப்புகளை முற்றிலும் தவிர்க்க வேண்டியதில்லை. சில எளிய தந்திரங்கள் மூலம், இரத்த சர்க்கரையை கட்டுப்பாட்டில் வைத்துக்கொண்டே தீபாவளி இனிப்புகளை ருசிக்கலாம். அந்த பயனுள்ள தந்திரங்கள் என்னென்ன என்று இந்த பதிவில் தெரிந்து கொள்ளலாம்.

நார்ச்சத்து நிறைந்த உணவுகளுடன் இனிப்புகளை சேர்த்து சாப்பிடலாம்

முழு தானியங்கள், நட்ஸ் அல்லது விதைகள் போன்ற நார்ச்சத்து அதிகம் உள்ள உணவுகளுடன் இனிப்புகளை உட்கொள்வதன் மூலம் இரத்தம் சர்க்கரை உறிஞ்சுவதை மெதுவாக்கலாம். உதாரணமாக, தீபாவளி இனிப்புகள் சாப்பிடும்போது அதனுடன் சில பாதாம் பருப்புகளை உட்கொள்ளவும். இது குளுக்கோஸின் நீண்ட, நிலையான வெளியீட்டை ஆதரிப்பதால், இந்த உணவுகளில் உள்ள நார்ச்சத்து இரத்த சர்க்கரையின் திடீர் உயர்வைத் தவிர்க்க உதவுகிறது.

இயற்கை இனிப்புகள் கொண்ட பலகாரங்களை தேர்ந்தெடுக்கவும்

சுத்திகரிக்கப்பட்ட சர்க்கரைக்குப் பதிலாக பேரீச்சம்பழம், வெல்லம் அல்லது தேங்காய் சர்க்கரை போன்ற இயற்கை இனிப்புகளால் செய்யப்பட்ட இனிப்புகளைத் தேர்ந்தெடுக்கவும். இவை வெள்ளை சர்க்கரையை விட மெதுவாக இரத்த சர்க்கரை அளவை அதிகரிக்கின்றன, ஏனெனில் அவை குறைந்த கிளைசெமிக் குறியீட்டைக் கொண்டுள்ளன. இந்த ஆரோக்கியமான மாற்றுப்பொருட்களைப் பயன்படுத்தி பலவிதமான இனிப்புகளைத் தயாரிக்கலாம், இது குறைந்த இரத்த சர்க்கரை தாக்கத்துடன் அதே சுவையை வழங்குகிறது.

வெந்தயத்தை பயன்படுத்த மறந்து விடக்கூடாது

வெந்தய விதைகள் இரத்தத்தில் உள்ள சர்க்கரை அளவை கட்டுப்படுத்தும் பண்புகளைக் கொண்டவை. தீபாவளி இனிப்புகளை ருசிக்கும் முன், வெந்தயத்தை ஊறவைத்த ஒரு கிளாஸ் தண்ணீரை குடிக்கலாம். இந்த நீர் குளுக்கோஸ் அளவை இயற்கையாக கட்டுப்படுத்த உதவுகிறது. இல்லயெனில், வீட்டில் தயாரிக்கப்பட்ட இனிப்புகளில் சிறிதளவு வெந்தயப் பொடியைச் சேர்ப்பதும் இரத்தச் சர்க்கரையின் தாக்கத்தை ஈடுசெய்ய உதவும்.

தொடர்ச்சியாக சாப்பிடுவதைத் தவிர்க்கவும்

ஒரே நேரத்தில் இனிப்புகளை முழுவதுமாக சாப்பிடுவதற்குப் பதிலாக, இடைவெளி விட்டு சாப்பிடவும். அதாவது ஒரு சிறிய அளவு இனிப்பு சாப்பிட்டபின் குறைந்தது 1 மணி நேரம் இடைவெளிக்கு பிறகே அடுத்த இனிப்பை சாப்பிட வேண்டும் . இந்த முறையானது சர்க்கரையை படிப்படியாக வளர்சிதை மாற்ற உங்கள் உடலுக்கு நேரம் கொடுப்பதன் மூலம் இரத்த குளுக்கோஸ் அளவுகளில் திடீர் தாண்டுதல்களைத் தவிர்க்கிறது.

இலவங்கப்பட்டை பொடி ரகசியம்

இலவங்கப்பட்டை இரத்த சர்க்கரை அளவை நிர்வகிப்பதில் மிகவும் உறுதுணையாக இருக்கும். இந்த மசாலா இன்சுலின் உணர்திறனை அதிகரிக்கிறது, இது குளுக்கோஸை உடல் திறமையாக பயன்படுத்த உதவுகிறது. நீங்கள் வீட்டில் தீபாவளி இனிப்புகளை தயாரிக்கும் பட்சத்தில் லட்டு, ஹல்வா அல்லது பிற இன்னபிற இனிப்புகளில் சிறிதளவு இலவங்கப்பட்டை பொடியை சேர்ப்பதை வழக்கமாக வைத்துக்கொள்ளுங்கள்.

Disclaimer: இந்தக் கட்டுரையில் வழங்கப்பட்ட தகவல்கள் பொதுவான தகவல் மற்றும் கல்வி நோக்கங்களுக்காக மட்டுமே, மேலும் இது தொழில்முறை மருத்துவ ஆலோசனை, நோயறிதல் அல்லது சிகிச்சைக்கு மாற்றா பகிரப்படவில்லை. மருத்துவ நிலை குறித்து உங்களுக்கு ஏதேனும் கேள்விகள் இருந்தால் உங்கள் மருத்துவர் அல்லது தகுதிவாய்ந்த சுகாதார வழங்குநரின் ஆலோசனையைப் பெறவும்.