உங்களுக்கு சர்க்கரை நோய் இருக்கா? அப்ப முடி கொத்து கொத்தா கொட்டுமாம்...அத எப்படி தடுக்கலாம் தெரியுமா?

Diabetes and Hair Loss: முடி உதிர்வதற்கு பல காரணங்கள் உள்ளன. அவற்றில் ஒன்று சர்க்கரை நோய் இருப்பது. சாதாரண நபர்களை காட்டிலும், சர்க்கரை நோயினால் பாதிக்கப்பட்டிருக்கும் மக்களுக்கு முடி உதிர்தல் அதிகமாக இருக்குமாம். அதை எவ்வாறு தடுக்கலாம் என நீங்கள் தெரிந்துகொள்ள வேண்டும்.

முடி உதிர்வது என்பது இப்போது சர்வ சாதாரணமாகிவிட்டது. நிபுணர்களின் கூற்றுப்படி, மக்கள் பொதுவாக ஒவ்வொரு நாளும் 50 முதல் 100 முடியை இழக்கிறார்கள். இந்த எண்ணிக்கை அதிகமாக இருந்தால் சீப்பு, நீங்கள் அணியும் ஆடைகள், தரைகள் மற்றும் உங்கள் குளியலறையிலும் முடியைக் காணலாம். பல பெண்கள் வயதாகும்போது முடியை இழக்கிறார்கள் என்பது உண்மைதான்.

ஆனால், உங்கள் வயதை நீங்கள் எப்போதும் குறை சொல்ல முடியாது. நீரிழிவு நோய் போன்ற பல காரணங்களால் உங்களுக்கு முடி உதிர்தல் ஏற்படலாம். முடி உதிர்தலுக்கு நீரிழிவு நோய் எவ்வாறு பங்களிக்கிறது என்றும் இந்த முடி உதிர்தலை எவ்வாறு குறைக்கலாம் என்று இக்கட்டுரையில் தெரிந்துகொள்ளுங்கள்.

நீரிழிவு நோய் முடி உதிர்தலுக்கு வழிவகுக்கும்

நீரிழிவு என்பது ஒரு நாள்பட்ட, வளர்சிதை மாற்ற நோயாகும். இது அதிகளவு இரத்த குளுக்கோஸ் அல்லது இரத்த சர்க்கரையால் வகைப்படுத்தப்படுகிறது. காலப்போக்கில், இது கண்கள், இதயம், சிறுநீரகங்கள், இரத்த நாளங்கள் மற்றும் நரம்பு போன்ற உறுப்புகளுக்கு கடுமையான சேதத்தை ஏற்படுத்துகிறது என்று உலக சுகாதார அமைப்பு தெரிவித்துள்ளது.

மோசமான இரத்த ஓட்டம்

உங்கள் உச்சந்தலையில் இரத்த ஓட்டம் அதிகரிக்கும்போது, முடி வளர்ச்சி அதிகரிக்கும். ஆனால், உயர் இரத்த சர்க்கரை அளவு இரத்த நாளங்களை சேதப்படுத்தும் மற்றும் உச்சந்தலையில் இரத்த ஓட்டத்தை குறைக்கும். இதனால், ஆரோக்கியமான முடி வளர்ச்சிக்கு தேவையான ஊட்டச்சத்துக்கள் மற்றும் ஆக்ஸிஜனை முடியின் வேர்களில் இழக்க நேரிடும்.

ஹார்மோன் சமநிலையின்மை

நீரிழிவு நோய் ஹார்மோன் ஏற்றத்தாழ்வுகளை ஏற்படுத்தும். இது முடி உதிர்தலுக்கு வழிவகுக்கும். உதாரணமாக, அதிகளவு இன்சுலின் மற்றும் ஆண்ட்ரோஜன் ஹார்மோன்கள் இருந்தால், அவை முடி உதிர்வைத் தூண்டும்.

அழற்சி

நீரிழிவு நோய் உடலில் நாள்பட்ட அழற்சியை ஏற்படுத்தும், முடியின் வேர்களை சேதப்படுத்தும் மற்றும் முடி உதிர்தலை ஏற்படுத்தும்.

ஊட்டச்சத்து குறைபாடுகள்

நீரிழிவு நோயாளிகள் ஊட்டச்சத்து குறைபாடுகளுக்கு ஆளாகலாம். இது முடி ஆரோக்கியத்தை பாதிக்கும். எனவே, பயோட்டின், இரும்பு மற்றும் துத்தநாகம் நிறைந்த உணவுகளை நீங்கள் சாப்பிடவில்லை என்றால், அது முடி உதிர்தலுக்கு வழிவகுக்கும்.

மன அழுத்தம்

நீரிழிவு நோயை நிர்வகிப்பது மிகவும் மன அழுத்தமாக இருக்கும். மன அழுத்தம் முடி உதிர்தலுக்கு பங்களிக்கும். மேலும், இது உங்கள் ஒட்டு மொத்த ஆரோக்கியத்தையும் பாதிக்கும்.

முடி உதிர்தல் மீளக்கூடியதாக இருக்கலாம்

பெரும்பாலான மக்கள் முடி மீண்டும் வளர பல்வேறு விஷயங்களை முயற்சி செய்கிறார்கள். ஆனால், அவை அனைத்தும் எல்லாருக்கும் வேலை செய்யாது. சில சந்தர்ப்பங்களில், நீரிழிவு தொடர்பான முடி உதிர்தல் மீளக்கூடியதாக இருக்கும். முடி உதிர்வுக்கான அடிப்படைக் காரணத்தைக் கண்டறிந்து, உங்கள் முடி வளர்ச்சியை நீங்கள் ஊக்குவிக்கலாம்.

எனவே, மோசமான இரத்த ஓட்டம் முடி உதிர்தலுக்கு பங்களித்தால், நீரிழிவு நோயை நிர்வகித்தல் மற்றும் இரத்த சர்க்கரை கட்டுப்பாட்டை மேம்படுத்துதல் ஆகியவை இரத்த ஓட்டத்தை மேம்படுத்தவும், முடி மீண்டும் வளரவும் உதவும். முடியின் வேர்கள் நிரந்தரமாக சேதமடைந்தவர்களுக்கு மீண்டும் முடி வளர்வது ஒரு மெதுவான செயலாக இருக்கலாம்.

நீரிழிவு நோயால் முடி உதிர்வதைத் தடுக்கும் வழிகள்

இரத்த சர்க்கரை அளவை ஆரோக்கியமான வரம்பிற்குள் வைத்திருப்பது ஒட்டுமொத்த ஆரோக்கியத்திற்கும் முக்கியமானது மற்றும் முடி உதிர்தலைத் தடுக்க உதவும். உயர் இரத்த சர்க்கரை அளவு இரத்த நாளங்களை சேதப்படுத்துவதன் மூலமும், உச்சந்தலையில் இரத்த ஓட்டத்தை குறைப்பதன் மூலமும் முடி உதிர்தலுக்கு பங்களிக்கும்.

எனவே, ஆரோக்கியமான உணவு, உடல் செயல்பாடு மற்றும் தேவையான மருந்துகளை உள்ளடக்கிய நீரிழிவு மேலாண்மை திட்டத்தை உருவாக்க உங்கள் மருத்துவருடன் இணைந்து பணியாற்றுவது முக்கியம். முடி உதிர்வைத் தவிர்க்க நீங்கள் இன்னும் பலவற்றைச் செய்யலாம்.

ஊட்டச்சத்து குறைபாடுகளை நிவர்த்தி செய்யவும்

நீரிழிவு நோயாளிகள் ஊட்டச்சத்து குறைபாடுகளுக்கு ஆளாகக்கூடும் என்பதால், உணவில் ஊட்டச்சத்து நிறைந்த உணவுகள் சேர்ப்பதை உறுதி செய்வது முக்கியம். தேவைக்கேற்ப சப்ளிமெண்ட்ஸ் எடுத்துக்கொள்வதைக் கூட நீங்கள் பரிசீலிக்கலாம். உணவுகளை எடுத்துக்கொள்ளும் முன் கவனமாக தேர்வு செய்ய வேண்டும்.

வீக்கத்தைக் குறைக்கவும்

முடி உதிர்வதைத் தடுக்க உடலில் ஏற்படும் அழற்சியைக் குறைக்க நடவடிக்கை எடுக்கவும். நீங்கள் அழற்சி எதிர்ப்பு உணவை உண்ணலாம், வழக்கமான உடற்பயிற்சி செய்யலாம் மற்றும் மன அழுத்தத்தை நிர்வகிக்கலாம்.

ஹார்மோன் ஏற்றத்தாழ்வுகளை சரிபார்க்கவும்

சர்க்கரை நோய் ஹார்மோன் ஏற்றத்தாழ்வுகளை ஏற்படுத்தி, முடி உதிர்தலுக்கு வழிவகுக்கும். எனவே, முடி உதிர்தலுக்கு பங்களிக்கும் ஹார்மோன் ஏற்றத்தாழ்வுகளை நிவர்த்தி செய்ய உங்கள் மருத்துவரை அணுக வேண்டும்.

மேற்பூச்சு சிகிச்சைகளைப் பயன்படுத்துவதைக் கவனியுங்கள்

நீரிழிவு தொடர்பான முடி உதிர்வைத் தடுப்பதில் உதவியாக இருக்கும் மேற்பூச்சு சிகிச்சைகளை நீங்கள் எப்போதும் முயற்சி செய்யலாம். எடுத்துக்காட்டாக, மினாக்ஸிடில் என்பது முடி வளர்ச்சியைத் தூண்டக்கூடிய ஒரு மருந்து. மேலும், முடி வளர்ச்சியை ஊக்குவிப்பதில் உதவியாக இருக்கும் பல முடி வளர்ச்சி சப்ளிமெண்ட்ஸ் மற்றும் ஷாம்புகள் உள்ளன.

ஆனால், நீரிழிவு நோயாளிகள் அனைவருக்கும் முடி உதிர்வு ஏற்படாது. மேலும் முடி உதிர்தலுக்கு பிற அடிப்படை காரணங்கள் இருக்கலாம். முடி உதிர்தலை நீங்கள் சந்தித்தால், உங்கள் மருத்துவரிடம் பேசி அடிப்படைக் காரணத்தைக் கண்டறிந்து, சரியான சிகிச்சை முறைகளை ஆராய்வது நல்லது.