கூந்தலை பொலிவாக்கும் பழ ஹேர் கண்டிஷனர்கள்!!!

வீட்டிலேயே கூந்தலை நன்கு பராமரிக்க வேண்டுமென்று நினைத்தால், அதற்கு நன்கு கனிந்த பப்பாளி சிறந்ததாக இருக்கும். அதிலும் கனிந்த பப்பாளி நன்கு மசித்து, அத்துடன் தயிர் மற்றும் 1-2 துளிகள் கிளிசரின் விட்டு, கூந்தலில் தடவி, 30-45 நிமிடம் ஊற வைத்து, நீரில் அலசினால், கூந்தல் நன்கு பட்டுப் போன்று, பொலிவோடு மின்னும். அதுமட்டுமின்றி, கூந்தலில் வெடிப்புகள் ஏற்படாமலும் இந்த முறை தடுக்கும்.

கூந்தல் பராமரிப்பிற்கு இருக்கும் பழங்களில் வெண்ணெய் பழம் எனப்படும் அவோகேடோவும் ஒன்று. அதற்கு வெண்ணெய் பழத்தை வேக வைத்து, மசித்து, சிறிது தேன், ஷியா வெண்ணெய், ஆப்பிள் சிடர் வினிகர் மற்றும் தயிர் சேர்த்து, நன்கு கலந்து, கூந்தல் மற்றும் ஸ்கால்ப்பில் தடவி, 20-25 நிமிடம் ஊற வைத்து பின் குளிர்ந்த நீரில் அலச வேண்டும்.

பேரிக்காயும் கூந்தலை பட்டுப் போன்று வைப்பதில் சிறந்தது. அதற்கு இதனை நன்கு அரைத்து, அதோடு ஷியா வெண்ணெய், தேங்காய் எண்ணெய் மற்றும் தேன் சேர்த்து, அடங்காத முடி உள்ளவர்கள் கூந்தலுக்கு தடவி, 30 நிமிடம் ஊற வைத்து, பின் குளிர்ந்த நீரில் அலசினால், கூந்தலுக்கு கண்டிஷனர் போட்டது போன்று இருக்கும்.

கூந்தல் நன்கு அடர்த்தியாக, அழகாக பொலிவோடு இருக்க வேண்டுமெனில் அதற்கு ஸ்ட்ராபெர்ரி ஹேர் கண்டிஷனர் தான் சிறந்தது. அதற்கு ஸ்ட்ராபெர்ரியை மசித்து, அத்துடன் மயோனைஸ் அல்லது தயிர் சேர்த்து, கூந்தலுக்கு தடவி, 30 நிமிடம் ஊற வைத்து, பின் நீரில் அலச வேண்டும். இல்லையெனில் ஸ்ட்ராபெர்ரியுடன் பால் சேர்த்து, கூந்தலுக்கு தடவலாம்.